Disa nga veçoritë që lejojnë rrjetet e kriptomonedhave të veprojnë si një regjistër i sigurt i transaksioneve financiare janë gjithashtu të zbatueshme për ruajtjen e të dhënave mjekësore. Meqenëse shumica e blockchaineve janë krijuar si sisteme të shpërndara që regjistrojnë dhe mbrojnë skedarët e të dhënave përmes përdorimit të kriptografisë, është jashtëzakonisht e vështirë për dikë që të prishë ose ndryshojë të dhënat pa pasur miratimin e të gjithë pjesëmarrësve të tjerë të rrjetit. Prandaj, pandryshueshmëria është një nga veçoritë që mundësojnë krijimin e bazave të të dhënave të pakorruptueshme për dosjet mjekësore. Për më tepër, arkitektura peer-to-peer e përdorur në blockchain lejon që të gjitha kopjet e të dhënave të një pacienti të sinkronizohen me njëra-tjetrën ndërsa bëhen përditësimet, edhe pse ato ruhen në kompjuterë të ndryshëm.
Vlen të përmendet se rrjetet blockchain janë të shpërndarë por jo gjithmonë të decentralizuar (përsa i përket qeverisjes). Decentralizimi nuk është një gjë binare, kështu që në varësi të mënyrës se si shpërndahen nyjet dhe nga arkitektura e përgjithshme, sistemet e shpërndara mund të paraqesin shkallë të ndryshueshme të decentralizimit. Në kontekstin e kujdesit shëndetësor,rrjetet blockchain zakonisht ndërtohen si një rrjet privat, në krahasim me ato publike që zakonisht përdoren si regjistra të kriptomonedhave.
